வட்டுவாகல் வெடிப்பு சம்பவத்தில் படுகாயமடைந்த ஒருவர் பலி..! நிலத்தில் புதைந்திருந்த வெடிபொருளை தோண்ட முயன்றதாக கூறப்படுகிறது..

முல்லைத்தீவு வட்டுவாகல் பகுதியில் இடம்பெற்ற வெடிப்பு சம்பவத்தில் படுகாயமடைந்த நிலையில் வைத்தியசாலையில் அனுமதிக்கப்பட்டிருந்த ஒருவர் உயிரிழந்துள்ளார். 

இன்று மாலை வட்டுவாகல் பாலத்திற்கு அருகில் உள்ள சர்பத் கடை ஒன்றுக்கு சென்ற இரு இளைஞர்கள் சர்பத் வாங்கியதுடன் கடைக்கு பின்னால் சென்ற நிலையில் நிலத்திலிருந்த வெடிபொருள் வெடித்துள்ளது. 

சம்பவத்தில் இரு இளைஞர்களும் படுகாயமடைந்த நிலையில் உடனடியாக முல்லைத்தீவு மாவட்ட வைத்தியசாலையில் அனுமதிக்கப்பட்டிருந்தனர். 

எனினும் ஒருவருடைய நிலை கவலைக்கிடமாக இருந்த நிலையில் தீவிர சிகிச்சை பிரிவில் அவருக்கு சிகிச்சையளிக்கப்பட்ட நிலையில் சிகிச்சை பலனின்றி அவர் உயிரிழந்துள்ளார். 

சம்பவத்தில் காயமடைந்த மற்றய இளைஞர் தொடர்ந்தும் சிகிச்சை பெற்றுவருகின்றார். இதேவேளை குறித்த இருவரும் நிலத்தில் புதைந்திருந்த அபாயகரமான வெடிபொருளை 

தோண்டி எடுக்க முயன்றதாகவும் கூறப்படுகின்றது.