மணல் அகழ்வு பிரச்சினை..! A-9 வீதியில் வாள்களுடன் மணல் மாபியாக்கள் மோதல், ஒருவர் கொலை, 3 பேர் ஆபத்தான நிலையில்..

கிளிநொச்சி உமையாள்புரம் பகுதியில் மணல் அகழ்வு விடயத்தில் இரு குழுக்களுக்கிடையில் உருவான தர்க்கம் மோதலில் முடிந்த நிலையில் ஒருவர் கொலை செய்யப்பட்டுள்ளதுடன் மேலும் 3 பேர் படுகாயமடைந்து ஆபத்தான நிலையில் வைத்தியசாலையில் அனுமதிக்கப்பட்டுள்ளனர். 

குறித்த சம்பவம் இன்று காலை 11.30 மணியளவில் ஏ-9 பிரதான வீதியில் உமையாள்புரம் பகுதியில் இடம்பெற்றிருக்கின்றது. மணல் அகழ்வு விடயத்தை பொலிஸாருக்கு தொிவித்த சம்பவம் ஒன்றினை அடிப்படையாக கொண்டு இரு குழுக்களுக்கிடையில் வாள்கள் மற்றும் 

தடிகள், கம்பிகளுடன் இன்று காலை மோதல் ஏற்பட்டிருக்கின்றது, சம்பவத்தில் 4 பேர் படுகாயமடைந்து ஆபத்தான நிலையில் வைத்தியசாலையில் அனுமதிக்கப்பட்டிருந்த நிலையில் ஒருவர் உயிரிழந்துள்ளார். ஏனைய 3 பேர் ஆபத்தான நிலையில் சிகிச்சை பெற்றுவருகின்றனர். 

சம்பவத்துடன் தொடர்புடைய சந்தேகநபர்கள் சிலர் கிளிநொச்சி பொலிஸ் நிலையத்தில் சரணடைந்துள்ளதுடன், மேலும் சிலரை பொலிஸார் கைது செய்துள்ளனர். மேலதிக விசாரணைகளை பொலிஸார் தீவிரப்படுத்தியிருக்கின்றனர்.