தாய் நிலத்துக்கு பெருமை சேர்க்க வேண்டும் என்ற கனவு நிறைவேறியது!! -இந்திய அணிக்கு மேலும் தமிழ் வீரர்கள் கிடைப்பார்கள் என்கிறார் நடராஜன்-

இந்திய அணியில் இடம்பிடித்துள்ள நடராஜன் அவுஸ்திரேலியாவில் இருந்து சொந்த ஊரான சேலம் மாவட்டம் சின்னப்பம்பட்டிக்கு வந்த அவருக்கு உற்சாக வரவேற்பு வழங்கப்பட்டுள்ளது.

இந்நிலையில் சேலம் மாவட்டத்திற்கு பெருமை சேர்க்க வேண்டும் என்ற கனவு நிறைவேறியுள்ளதாக கிரிக்கெட் வீரர் நடராஜன் கூறியுள்ளார்.

இதுதொடர்பாக செய்தியாளர்கள் சந்திப்பில் பேசிய நடராஜன் மேலும் தெரிவிக்கையில்:-

ஒருநாள் போட்டியில் வாய்ப்பு கிடைக்கும் என எதிர்பார்க்கவில்லை. இந்திய அணியில் அனைவரும் பாகுபாடின்றி ஆதரவளித்தனர். அவுஸ்திரேலியா தொடரில் கிடைத்த வாய்ப்பை சரியாக பயன்படுத்த நினைத்தேன். அவுஸ்திரேலிய வீரர் வார்னர் எனக்கு முழு ஆதரவளித்தார், பாராட்டினார். நடந்து முடிந்த ஐ.பி.எல் அனுபவம், சர்வதேச போட்டிகளில் உதவியாக இருந்தது. 

என்னுடைய முதல் ஒருநாள் போட்டியில் விக்கெட் எடுத்தது கனவுபோல் இருந்தது. அவுஸ்திரேலியாவில் வெற்றிக் கோப்பையை கையில் ஏந்திய தருணம் மகிழ்ச்சியாக இருந்தது.

கடின உழைப்பு என்றுமே வீண் போகாது. நிச்சயம் உயர்த்தும். அதற்கு நானே சாட்சி. குழந்தையை பார்க்க வேண்டும் என்பதை விட, நாட்டிற்காக விளையாடியதில் மகிழ்ச்சி.

சேலத்தில் இருந்து பல வீரர்கள் இந்திய அணிக்கு கிடைப்பார்கள் என்று நம்புகிறேன். எனக்கு முழு ஆதரவு அளித்த தமிழக மக்களுக்கு நன்றி என்றார்.