தற்கொலை தாக்குதல் தொடா்பான விசாரணை ஆணைக்குழு அறிக்கை பகிரங்கப்படுத்தப்படும்..!
உயிா்த்த ஞாயிறு தினத்தில் நடாத்தப்பட்ட தற்கொலை குண்டு தாக்குதல் தொடா்பான விசாரணைகளை நடாத்துவதற்காக அமைக்கப்பட்டுள்ள விசாரணை ஆணைக்குழுவின் அறிக்கை பகிரங்கப்படுத்தப்படும் என ஜனாதிபதி மைத்திாிபால சிறிசேனா கூறியுள்ளாா்.
புதிய பாதுகாப்புச் செயலராக நியமிக்கப்பட்டுள்ள ஜெனரல் சாந்த கோட்டேகொட நேற்று முற்பகல் பாதுகாப்பு அமைச்சில் கடமைகளைப் பொறுப்பேற்றார்.
அந்த நிகழ்வில் கலந்துகொண்ட பின்னர் பாதுகாப்புத் துறையின் மூத்த அதிகாரிகளுடன் அரச தலைவர் கலந்துரையாடினார். அந்தச் சந்திப்பின்போதே இதனைத் தெரிவித்தார் என்று அவரது ஊடகப் பிரிவு அனுப்பியுள்ள செய்திக் குறிப்பில் தெரிவிக்கப்பட்டுள்ளது.
மேலும் அதில் கூறப்பட்டுள்ளதாவது,
பயங்கரவாதத் தாக்குதல் தொடர்பாக நியமிக்கப்பட்டுள்ள 3 பேரைக் கொண்ட சிறப்பு விசாரணைக் குழுவின் அறிக்கை அனைவருக்கும் பகிரங்கப்படுத்தப்படும்.
இந்த மிலேச்சத்தனமான பயங்கரவாதத்தை முற்றாக ஒழித்து நாட்டின் தேசிய பாதுகாப்பு விரைவில் உறுதி செய்யப்படும் என்று அரச தலைவர் குறிப்பிட்டார்.
இந்தத் தாக்குதல்களுக்கு முகம்கொடுத்த பின்னர் உலகின் வேறெந்த நாட்டிலும் இடம்பெறாத வகையில் பயங்கரவாதத்துக்கு எதிரான நடவடிக்கைகளை மேற்கொண்டு தகவல்களைத் திரட்டவும், கைது நடவடிக்கைகளை மேற்கொள்ளவும் நாட்டின் புலனாய்வுது் துறை உள்ளிட்ட பாதுகாப்புத் தரப்பினரால் முடிந்துள்ளது.
அவர்களின் திறமையை பாராட்டுகின்றேன். அதற்கான பங்களிப்பை வழங்கிய அனைவருக்கும் எனது நன்றியைத் தெரிவித்துக் கொள்கின்றேன் என்று அரச தலைவர் குறிப்பிட்டார்.
பாடசாலைகளின் பாதுகாப்பை உறுதிப்படுத்துவதற்காக எதிர்காலத்தில் நடைமுறைப்படுத்தப்படவுள்ள பாதுகாப்பு வேலைத் திட்டங்கள் தொடர்பாகவும், அரச அலுவலகங்களின் செயற்பாடுகளை வழமைபோன்று மேற்கொள்வது தொடர்பாகவும் இதன்போது கலந்துரையாடப்பட்டது.
நாட்டின் எந்தச் செயற்பாடுகளும் செயலிழப்பதற்கு இடமளிக்காது அவற்றை வழமைபோன்று மேற்கொள்வதற்கு நடவடிக்கை எடுக்க வேண்டும் என்றும் அரச தலைவர் வலியுறுத்தினார். என்றுள்ளது.
