வடக்கு மாகாண சபை எதிர்க்கட்சித் தலைவர் தவராசா அவர்களிடம் வாங்கிக் கட்டிக்கொண்ட முதலமைச்சர் விக்னேஸ்வரன்
ஈ.பி.டி.பி. கட்சியின் நாடாளுமன்ற உறுப்பினர் டக்ளஸ் தேவானந்தாவை மாகாண சபையின் நேற்றைய அமர்வில் விமர்சித்தபோது சபையின் எதிர்க்கட்சித் தலைவர் சி.தவராசா பொங்கி எழுந்தார். அத்துடன் நிற்காது முதல்வரையும் கடுமையாகச் சாடினார்.
வடக்கு மாகாண சபையின் அடுத்தாண்டுக்கான வரவு செலவுத் திட்டத்தின் இரண்டாம் வாசிப்பு நேற்று நடைபெற்றது.
அது தொடர்பில் முதலமைச்சர் உரை ஆற்றினார். பின்னர் எதிர்க்கட்சித் தலைவர் உரையாற்றினார். அதில் மாகாண சபை தவறவிட்ட பல விடயங்களைச் சுட்டிக்காட்டி மேலும் பல குற்றச்சாட்டுகளையும் முன்வைத்தார்.
‘‘அரசு எதையும் தரவில்லை என்று கூறிக்கொண்டு இருக்கும் நீங்கள் அரசிடம் எதையாவது பெறுவதற்கு முயற்சி எடுத்தீர்களா?’’ என்று தவராசா முதல்வரிடம் கேள்வி எழுப்பியிருந்தார். அதற்கு தலமைச்சர் பதிலளிக்கும்போது ஒரு கட்டத்தில் தெரிவித்ததாவது:
“நீண்ட காலமாக இலங்கை அரசுடன் நெருங்கிய உறவை வைத்திருக்கும் உங்கள் கட்சியின் செயலாளர் நாயகம் மக்களுக்கு என்னத்தைச் செய்தார்’’ என்று கிண்டலாகப் பதில் கேள்வியெழுப்பினார்.
“உங்களுக்கு அவரை பற்றி பேச வேண்டிய தேவையும் இல்லை. தகுதியும் இல்லை. அவர் இத்தனை காலம் இலங்கை அரசுடன் இணைந்திருந்து மக்களுக்கு ஆற்றிய சேவையில் ஒரு துளியைக்கூட நீங்கள் செய்யவில்லை. அவரால் எத்தனை குடும்பங்கள் வாழ்கின்றன என்பதைப் போய்ப் பாருங்கள்” என்று சூடாகவே எழுந்தார்.
