மலிங்க இருப்பது அணிக்கு பெரும் பலம்!! -தசூன் சானக்க-

சர்வதேச கிரிக்கெட்டில் பல வெற்றிகரமான சாதனைகளுடன் பந்துவீச்சு ஆலோசகராக லசித் மலிங்க இருப்பது அணிக்கு பெரும் பலம் என்று இலங்கை அணித் தலைவர் தசூன் சானக்க தெரிவித்துள்ளார். 

நடப்பு உலக ரி-20 சம்பியனான அவுஸ்திரேலியாவுக்கு எதிரான எதிர்வரும் போட்டிகள் குறித்து கருத்து தெரிவித்துள்ள அவர் இவ்விடயம் தொடர்பில் மேலும் தெரிவிக்கையில்:- 

உலக சாம்பியனான பெருமை அவுஸ்திரேலியாவுக்கு உண்டு, ஆனால் திறமையின் உச்சக்கட்டத்தை எட்டிய வீரர்கள் எமது அணியில் ஏராளமானவர்கள் உள்ளதானால், அவுஸ்திரேலியாவை வீழ்த்தும் திறன் எமக்கு உள்ளது.

சர்வதேச கிரிக்கெட்டில் பல வெற்றிகரமான சாதனைகளுடன் பந்துவீச்சு ஆலோசகராக லசித் மலிங்க இருப்பது அணிக்கு பெரும் பலம்.

கொரோனா காரணமாக குசல் மெண்டீஸ் முதல் போட்டியில் விளையாடுவார் என்பது உறுதியாகத் தெரியவில்லை. அவரைத் தவிர எங்களிடம் தற்சமயம் 3 விக்கெட் காப்பாளர்கள் உள்ளனர், அம் மூவரில் தினேஷ் சண்டிமால் விக்கெட் காப்பில் அதிகம் ஈடுபடுவார் என்று நம்புகின்றேன்.

கொரோனா தொற்றில் இருந்து மீண்டு வரும் சாமிக்க கருணாரத்ன மற்றும் நுவான் துஷார ஆகியோர் ஏற்கனவே குழுவில் உள்ளனர் மற்றும் 3 நாள் தனிமைப்படுத்தல் காலம் முடிவடைந்தவுடன் அவர்களின் பயிற்சியை மீண்டும் தொடங்குவார்கள். 

இதற்கிடையில், அவுஸ்திரேலியாவில் ரி-20 உலகக் கிண்ணம் எதிர்வரு ஆகஸ்ட் மாதம் நடைபெற உள்ளதால், இங்குள்ள ஆடுகளங்களைப் புரிந்து கொள்வதில் போட்டி முக்கிய பங்கு வகிக்கும் என்று எதிர்பார்க்கின்றோம் என்றார்.