புதிய பிரதம செயலாளருக்கு வவுனியாவில் வரவேற்பு!

வவுனியா அரச அதிபராக கடமையாற்றி வடமாகாண பிரதம செயலாளராக பதவி உயர்வு பெற்றுச்செல்லும் சமன் பந்துலசேனவிற்கு வவுனியாவில் இன்று(புதன்கிழமை) வரவேற்பளிக்கப்பட்டது.

தமிழ் விருட்சம் சமூக ஆர்வலர் அமைப்பின் ஏற்பாட்டில் குறித்த நிகழ்வுகள் ஏற்பாடு செய்யப்பட்டிருந்தது.

முன்னதாக வவுனியா மாவட்டசெயலக வாயிலில் இருந்து மங்களவாத்தியம் முழங்க ஊர்வலமாக அழைத்துச்செல்லப்பட்ட பிரதம செயலாளருக்கு மாலை அணிவித்து கௌரவம் அளிக்கப்பட்டது.

நிகழ்வில் மேலதிக அரசஅதிபர் தி.திரேஸ்குமார், பிரதேச செயலாளர் நா.கமலதாசன், சமூக ஆர்வலர்கள், பொதுஅமைப்புக்கள், அரச உயர்அதிகாரிகள், மதகுருமார்கள் உட்பட பலரும் கலந்துகொண்டனர்.

இதன்போது கருத்து வெளியிட்ட அவர், “அரச அதிபராக கடமையாற்றிய குறிப்பிட்ட காலப்பகுதிக்குள் எனக்கு பக்கபலமாக செயற்பட்ட அரச அதிகாரிகள், அரசியல்வாதிகள், பொதுஅமைப்புக்கள் மற்றும் ஊடகத்துறையினருக்கு எனது நன்றிகளை தெரிவித்துக்கொள்கிறேன்.

வடக்கின் பிரதம செயலாளராக கடமை ஏற்கவுள்ள நிலையில் வடமாகாண மக்களுக்கு இனமத பேதமற்று எனது சேவையை பணிகளை முன்னெடுப்பேன்.“ எனத் தெரிவித்துள்ளார்.