பேருந்தை வழிமறித்த இளைஞர்கள் குழு பேருந்தை அடித்து நொருக்கி, சாரதி மீது சரமாரி தாக்குதல்! கொரோனா அச்சத்தால் தொடரும் எதிர்ப்பு..

வவுனியா - முருகனுார் பகுதியில் ஆடைத்தொழிற்சாலைக்கு ஊழியர்களை கொண்டுசென்ற பேருந்து மீது கல்வீசி தாக்குதல் நடத்திய இளைஞர்கள் குழு அங்கிருந்து தப்பி சென்றுள்ளது. 

குறித்த சம்பவம் இன்று (12) காலை 7.00 மணியளவில் இடம்பெற்ற இச் சம்பவம் தொடர்பில் மேலும் தெரியவருவதாவது, 

சிதம்பரபுரம் பகுதியிலிருந்து வவுனியா இராசேந்திரகுளம் ஆடைத்தொழிற்சாலை நோக்கி ஊழியர்களை ஏற்றிச்சென்ற பேருந்து மீது முருகனூர் விவசாய பண்ணைக் அருகே 

முகங்களை மறைந்தவாறு நின்ற இளைஞர் குழுவினர் கல் வீச்சு தாக்குதல் மேற்கொண்டுள்ளனர். கல்வீச்சு தாக்குதலையடுத்து பேருந்தினை சாரதி நிறுத்திய போது 

பேருந்தினுள் புகுந்த இளைஞர் குழுவினர் சாரதி மீதும் தாக்குதல் மேற்கொண்டு அவ்விடத்தில் இருந்து தப்பித்துச் சென்றுள்ளனர்.

சம்பவத்தில் பேருந்தின் சகல கண்ணாடிகளும் முழுமையாக சேதமடைந்துள்ளதுடன் சாரதி காயமடைந்த நிலையில் வைத்தியசாலையில் அனுமதிக்கப்பட்டுள்ளார். 

மேலும் இந்த சம்பவத்தில் ஊழியர்கள் எவருக்கும் காயங்கள் எவையும் ஏற்படவில்லை.ஆடைத் தொழிற்சாலையினால் கொரோனா தொற்று பரவுவதாக 

வடமாகாணத்தில் பல பகுதிகளில் எதிர்ப்புக்கள் வெளியாகி வருகின்ற நிலையில் இச் சம்பவம் இடம்பெற்றுள்ளது. 

சம்பவ இடத்திற்கு விரைந்த வவுனியா பொலிஸார் குற்றத்தடுப்பு பிரிவினரின் உதவியுடன் மேலதிக விசாரணைகளை முன்னெடுத்து வருகின்றனர்.