ஒட்சிஜன் சிலிண்டர் என கூறி தீயணைப்பு சிலிண்டர் விற்பனை!! -பொலிஸாரிடம் வசமாக மாட்டினர்-

டெல்லியில் ஒட்சிஜன் சிலிண்டர் என தெரிவித்து தீயணைப்பு சிலிண்டரை விற்பனை செய்து பெண்ணை ஏமாற்றிய 2 பேர் பொலிஸாரினால் கைது செய்யப்பட்டனர்.

அங்கு கொரோனா பாதித்த தனது உறவினர் ஒருவருக்கு வழங்குவதற்காக பிந்தாப்பூர் பகுதியில் வசித்து வரும் பெண் ஒருவருக்கு ஒட்சிஜன் சிலிண்டர் தேவைப்பட்டது. 

இந்தியா முழுவதிலும் கொரோனா தொற்று எண்ணிக்கை உயர்ந்து வரும் சூழலில் ஒட்சிஜன் சிலிண்டர் தேவையும் அதிகரித்து உள்ளது.

இதனால் ஒட்சிஜன் சிலிண்டர் பற்றாக்குறை ஏற்பட்டு உள்ளது. இந்நிலையில், ஒட்சிஜன் சிலிண்டர் என கூறி அவரை 2 பேர் மோசடி செய்துள்ளனர். இது குறித்த அந்த பெண் கொடுத்த முறைப்பாட்டின்படி ஒட்சிஜன் சிலிண்டர் என கூறி தீயணைப்பு சிலிண்டரை விற்பனை செய்து என்னை ஏமாற்றி விட்டனர் என தெரிவித்து உள்ளார்.

இதனை தொடர்ந்து பொலிஸார் விசாரணை மேற்கொண்டு 2 பேரை கைது செய்துள்ளனர்.