பிரதமர் நரேந்திர மோடி தலமையின் கீழ் இந்தியா மீண்டெழும்..! ஜனாதிபதி கோட்டபாய நம்பிக்கை தொிவிப்பு..

இந்தியாவில் கொரோனா தொற்று தீவிரமாக பரவி வருவது தொடர்பில் ஜனாதிபதி கோட்டபாய ராஜபக்ஸ கரிசனை செலுத்தியுள்ளதாகவும், இது குறித்து இந்திய பிரதமருக்கு ஜனாதிபதி கடிதம் எழுதியுள்ளதாகவும் தொியவருகின்றது. 

இது குறித்து இந்திய பிரதமருக்கு ஜனாதிபதி அனுப்பிவைத்துள்ள கடிதத்தில் ஜனாதிபதி இந்தியாவின் கொரோனா வைரஸ் நிலவரம் குறித்த தனது கரிசனையை வெளியிட்டுள்ளார். இலங்கைக்கான இந்திய தூதரகம் இதனை தெரிவித்துள்ளது.

மனித குலத்தின் ஒருங்கிணைந்த முயற்சிகள் இத்தகைய தொற்றுநோய்களை தோற்கடிப்பதில் வெற்றிகண்டுள்ளன எனவும் ஜனாதிபதி தெரிவித்துள்ளார். அர்ப்பணிப்பு மிக்க நிபுணர்கள் மற்றும் துறைசார் நிபுணர்களின் உதவியுடன் இந்தியா இந்த நெருக்கடிக்கு தீர்வை காணும் 

எனவும் ஜனாதிபதி நம்பிக்கை வெளியிட்டுள்ளார். இலங்கை ஜனாதிபதி தனது கடிதத்தில் இந்தியா வழங்கிய கொரோனா வைரஸ் தடுப்பூசிக்காக இலங்கை மக்களின் சார்பில் நன்றியை தெரிவித்துள்ளார்.