சிறுவனை கடித்து குதறிய தெருநாய்கள்!! -வீதியில் விளையாடி கொண்டிருந்தபோது சம்பவம்-

தானே மாவட்டம் அம்பர்நாத் பகுதியில் கட்டிட வளாகத்தின் வீதியில் நண்பர்களுடன் விளையாடி கொண்டிருந்த சிறுவனை சுற்றிய தெருநாய்கள் அச் சிறுவனை கடித்துக் குதறியுள்ளது. 

குறித்த பகுதியைச் சேர்ந்த 4 வயது சிறுவனான சுமேத் லோகர் என்பவரே இச் சம்பவத்தில் காயமடைந்துள்ளார். 

நேற்று வீதியில் நண்பர்களுடன் விளையாடி கொண்டிருந்த போது அங்கு நின்ற 3 தெருநாய்கள் சிறுவன் சுமேத் லோகரை விரட்டியது. இதனால் பயந்து போன சிறுவன் அங்கிருந்து ஓடிய போது கால் தடுக்கி கீழே விழுந்தான். விரட்டி வந்த தெருநாய்கள் கீழே விழுந்து கிடந்த சிறுவனை கடித்து குதறியது.

சிறுவன் அலறி சத்தம் போட்டதால் அயலில் இருந்தவர்கள் விரைந்து வந்து நாய்களை விரட்டி அடித்தனர். பின்னர் சிறுவனை மீட்டனர். அவனுக்கு முதுகு பகுதியில் பலத்த காயம் ஏற்பட்டு இருந்தது. சிறுவனை வைத்தியசாலையில் சிகிச்சைக்காக பெற்றோர் அழைத்து சென்றனர்.