சித்ரா மீது கணவருக்கு சந்தேகம்!! - ஹேம்நாத்தின் கைதின் பின் வெளிவரும் உண்மைகள்-

நடிகை சித்ரா சில நாட்களுக்கு முன் தற்கொலை செய்து உயிரிழந்தார். சித்ராவின் தற்கொலை அவரது குடும்பத்தினர் மட்டும் அல்லாமல் சின்ன திரையை சேர்ந்தவர்கள் மற்றும் பொது மக்கள் இடையே பெரும் அதிர்ச்சியை ஏற்படுத்தியது. 

இது குறித்து பூந்தமல்லியை அடுத்த நசரத்பேட்டை போலீசார் வழக்குப்பதிவு செய்து விசாரித்து வந்தனர். நடிகை சித்ரா, ஹேம்நாத் என்பவரை காதலித்து வந்துள்ளார். 

சில மாதங்களுக்கு முன்பு சித்ராவுக்கும், ஹேம்நாத்க்கும் பதிவு திருமணம் நடந்தது.

இந்த திருமணத்தில் சித்ராவுக்கும், அவரது தாய் விஜயாவுக்கும் கருத்து வேறுபாடு இருந்ததாக கூறப்படுகிறது. சித்ரா தற்கொலை செய்து கொண்ட நேரத்தில் கணவர் ஹேம்நாத் விடுதிக்கு வெளியில் இருந்ததாக கூறப்படுகிறது. 

தற்கொலை செய்து கொண்ட சித்ராவின் உடலில் ரத்த காயங்கள் இருந்துள்ளது. கணவர் ஹேம்நாத் சித்ராவிடம் சண்டை போட்டு விடுதி அறையை விட்டு வெளியே போன பிறகு சித்ரா தற்கொலை செய்துகொண்டாரா? என பொலிஸ் விசாரணை செய்து வந்தனர்.

நடிகை சித்ராவின் கணவர் ஹேம்நாத் மற்றும் அவரது பெற்றோரிடம் ஆர்.டி.ஓ. இன்று செவ்வாய்க்கிழமை விசாரணை மேற்கொள்ள இருந்த நிலையில், சித்ராவை தற்கொலைக்கு தூண்டியதாக நசரத்பேட்டை பொலிஸார் ஹேம்நாத் மீது வழக்கு பதிவு செய்து கைது செய்தனர். அவரை பூந்தமல்லி நீதிமன்றத்தில் முன்னிலைப்படுத்தினர். அவரை சிறையில் அடைக்க உத்தரவிடப்பட்டுள்ளது. 

ஏற்கனவே ஹேமந்த் பலமுறை குடித்துவிட்டு சித்ராவின் படப்பிடிப்பு நடைபெறும் இடத்திற்குச் சென்று சண்டையிட்டு உள்ளார் என்பது விசாரணையில் அம்பலமானது. தற்போது பொலிஸ் விசாரணையில் மற்றொரு அதிர்ச்சி தகவல் வெளியாகியுள்ளது.

ஹேமந்த் சித்ரா மீது சந்தேகம் அடைந்ததாகவும், அதுகுறித்து அவருடன் சண்டை போட்டுள்ளதாகவும் பொலிஸ் விசாரணையில் தெரியவந்துள்ளது. இவற்றை  அடிப்படையாக கொண்டே ஹேம்நாத்தை பொலிஸார் கைது செய்துள்ளனர்.