பாலியல் பலாத்கார வழங்கை வாபஸ் பெற மறுத்த 15 வயது சிறுமி எரித்துக் படுகொலை!! -குற்றவாளியின் உறவினர்களின் கொடூரச் செயல்-

இந்தியாவின் உத்தர பிரதேசத்தில் பாலியல் பலாத்கார வழக்கை வாபஸ் பெற மறுத்த 15 வயது சிறுமி குற்றவாளியின் உறவினர்களால் எரித்துக் படுகொலை செய்யப்பட்டார்.

குறித்த மாநிலம் புலந்த்சர் பகுதியில் கடந்த ஆகஸ்ட் 15 ஆம் திகதி  15 வயது சிறுமியை பாலியல் பாலியல்பலாத்காரம் செய்த நபர் மீது அந்த சிறுமியின் பெற்றோர் உள்ளூர் பொலிஸ் நிலையத்தில் முறைப்பாடு பதிவு செய்தனர். 

பதிவு செய்யப்பட்ட முறைப்பாட்டின் அடிப்படையில், அதே ஊரில் பழத்தோட்டத்தின் பராமரிப்பாளராக வேலை செய்து வந்த ஹரீஷ் என்ற நபரை பொலிஸார் கைது செய்தனர்.

இந்நிலையில் கைது செய்யப்பட்ட நபரின் உறவினர்கள், வழக்கை வாபஸ் பெறுமாறு புகார் அளித்த சிறுமியின் குடும்பத்தை வற்புறுத்தி வந்ததாக கூறப்படுகிறது. இதனையடுத்து இன்று  புதன்கிழமை காலை ஹரீஷின் உறவினர்கள் 5 பேர், அந்த சிறுமியின் வீட்டிற்கு வந்து வழக்கை திரும்ப பெறுமாறு மிரட்டியுள்ளனர். இதற்கு அவள் மறுப்பு தெரிவிக்கவே, அவர்கள் கொண்டு வந்த பெட்ரோலை அந்த சிறுமியின் மீதி ஊற்றி கொளுத்திவிட்டுச் சென்றுள்ளனர்.

இந்த சம்பவம் நடந்த போது பெற்றோர் வீட்டில் இல்லாததால், அருகில் இருந்தவர்கள் சிறுமியின் அலறல் சத்தம் கேட்டு ஓடி வந்து தீயை அணைத்துள்ளனர். உடலில் 65 சதவீத தீக்காயங்களுடன் மருத்துவமனையில் அனுமதிக்கப்பட்ட அந்த சிறுமி இன்று புதன்கிழமை மாலை உயிரிழந்தார். இருப்பினும் இறப்பதற்கு முன்பாக அவர் அளித்த வாக்குமூலத்தில் சஞ்சய் என்ற நபரை சுட்டிக்காட்டியுள்ளார். 

வழக்கை திரும்ப பெறாததால் தனது மகளை எரித்து கொலை செய்தவர்கள் மீது, உயிரிழந்த பெண்ணின் தந்தை பொலிஸ நிலையத்தில் முறைப்பாடு செய்துள்ளார். இந்த வழக்கில் இதுவரை 3 பேர் கைது செய்யப்பட்டுள்ளனர். மேலும் குற்றம் சாட்டப்பட்டவர்களை பொலிஸார் தேடி வருகின்றனர்.