112 ஆவது வடக்கின் சமர் இன்று ஆரம்பம்

March 08, 2018ஆசிரியர் - Admin

யாழ். செய்ன்ற் ஜோன்ஸ் கல்லூரிக்கும் யாழ். மத்திய கல்லூரிக்கும் இடையிலான 112ஆவது வடக்கின் சமர் எனப்படும் வருடாந்த மாபெரும் கிரிக்கட் போட்டி யாழ். மத்திய கல்லூரி மைதானத்தில் இன்று முதல் சனிக்கிழமைவரை நடைபெறவுள்ளது.

இலங்கை பாடசாலைகள் மாபெரும் கிரிக்கெட் வரலாற்றில் கொழும்பில் றோயல் – தோமஸ், மாத்தறையில் தோமஸ் – செர்வேஷியஸ் ஆகிய போட்டிகளுக்கு அடுத்ததாக மூன்றாவது நீண்ட கால வரலாற்றைக் கொண்டது வடக்கின் சமராகும். அத்துடன் இந்த மூன்று மாபெரும் கிரிக்கெட் போட்டிகளே இலங்கையில் மூன்று நாட்களைக் கொண்ட பாடசாலை கிரிக்கெட் போட்டிகளாக விளையாடப்பட்டு வருகின்றன.

கடந்த வருடம்வரை நடந்துமுடிந்துள்ள 111 வடக்கின் சமர்களில் செய்ன்ற் ஜோன்ஸ் கல்லூரி 36 போட்டிகளிலும் மத்திய கல்லூரி 27 போட்டிகளிலும் வெற்றிபெற்றுள்ளன. 40 போட்டிகள் வெற்றிதோல்வியின்றி முடிவடைந்துள்ளதுடன், 7 போட்டிகளின் முடிவுகள் பற்றிய விபரங்கள் பதிவில் இல்லை. ஒரு போட்டி கைவிடப்பட்டது.

செய்ன்ற் ஜோன்ஸ் அணியினர் கடந்த வருடம் எஸ். ஜெனின் ப்ளெமின் தலைமையில் ஓர் இன்னிங்ஸ் மற்றும் 7 ஓட்டங்களால் வெற்றிபெற்றிருந்தனர். யாழ். மத்திய கல்லூரி கடைசியாக 2011இல் ஜெரிக் துஷானின் தலைமையில் வெற்றிபெற்றிருந்தது.

2016, 2017 ஆகிய இரண்டு வருடங்களிலும் வெற்றியீட்டிய செய்ன்ற் ஜோன்ஸ், மூன்றாவது தொடர்ச்சியான வெற்றிக்கு குறிவைத்து இவ் வருட வடக்கின் சமரை எதிர்கொள்கின்றது.
கடந்த வருட சமரில் அரைச் சதம் குவித்து அதி சிறந்த துடுப்பாட்ட வீரராகத் தெரிவான வி. யதுசன் இவ் வருடம் செய்ன்ற் ஜோன்ஸ் அணியின் தலைவராக விளையாடுகின்றார்.

கடந்த வருட 67 ஓட்டங்களுக்கு 10 விக்கட்களைக் கைப்பற்றி சிறந்த பந்துவீச்சாளர் மற்றும் ஆட்டநாயகன் ஆகிய இரண்டு விருதுகளையும் வென்றெடுத்த கனகரட்ணம் கபில்ராஜ் இவ் வருடம் உதவி அணித் தலைரவாக இடம்பெறுகின்றார்.

இதேவேளை, யாழ். மத்திய கல்லூரி கடந்த இரண்டு வருடங்களும் அடைந்த தோல்விகளை நிவர்த்தி செய்யும் குறிக்கோளுடன் இவ் வருடம் களம் இறங்கவுள்ளது.நான்காம் வருட வீரர் சிவலிங்கம் தசோபன், யாழ். மத்திய கல்லூரி அணித் தலைவராக விளையாடுகின்றார். இவர் 2017 வடக்கின் சமரில் சிறந்த சகலதுறை ஆட்டக்காரராக தெரிவாகியிருந்தார்.

மேலும் நடப்பு பருவகாலத்தில் கண்டி புனித அந்தோனியார், அக்குறணை அஸார் ஆகிய கல்லூரிகளுக்கு எதிராக இரண்டு சதங்களைக் குவித்த தசோபன், இவ் வருட சமரில் திறமையை வெளிப்படுத்துவார் என எதிர்பார்க்கப்படுகின்றது.

துணிச்சலுடன் துடுப்பெடுத்தாடும் ஸ்ரீஸ்கந்தராஜா கௌதமன் உதவி அணித் தலைவராக விளையாடுக்கின்றார். மூன்று வருடங்களுக்கு முன்னர் வடக்கின் சமரில் அதி சிறந்த களத்தடுப்பாளராக இவர் தெரிவாகியிருந்தார்.

இந்த இரண்டு அணிகளிலும் தலா மூன்று வீரர்களே சிரேஷ்ட வீரர்களாக இடம்பெறுவதால் அவர்கள் தத்தமது அணிகளுக்கு அதிகபட்ச ஆற்றல்களை வெளிப்படுத்த வேண்டியவர்களாக உள்ளனர். அதேவேளை, இளஞ் சிங்கங்கள் பயம் அறியாது என்பதற்கு இணங்க முதலாம்., இரண்டாம் வருட வீரர்களும் தங்களது கல்லூரிகளை கௌரவ நிலைக்கு இட்டுச் செல்ல முயற்சிப்பர் என எதிர்பார்க்கப்படுகின்றது.

செய்ன்ற் ஜோன்ஸ் அணியினர்: அமர்ந்திருப்பவர்கள் இடமிருந்து வலமாக ஏ.டி.. சுரேந்திரன் (பயிற்றுநர்), வி. யதுஷன் (அணித் தலைவர்), வண. என்.ஜே. ஞானப்பொன்ராஜா (அதிபர்), கே. கபில்ராஜ் (உதவி அணித் தலைவர்), வி. குமணன் (விளையாட்டுத்துறை பொறுப்பாசிரியர்), மத்திய வரிசையில் ஜே. சுபீட்சன் திப்பியூஸ், எஸ். ஜோயல் பிரவீன், வி. அபிலக்ஷன், பி. எல்ஷான் டெனுஷன், ரி. டினோஷன், டி. ஷெரோபன், எம். அபிநாஷ், எஸ்.ஷானுஷன், என். சௌமியன், பின்வரிசையில் என். ரதுஷன், ஏ. ஜதுஷன், எம். ஹேமதுஷன், ஜே. மரிய திலக்ஷன், என்.என். டிலக்சன், எஸ். பிரஷாந்த், டி. ஜோநதன் பிரசன்னா, சி.பி. தனுஜன், எஸ். ஜேஜீவன்.

யாழ். மத்திய அணியினர்: அமர்ந்நிருப்பவர்கள் இடமிருந்து வலமாக எஸ். சுரேஷ்மோகன் (பயிற்றுநர்), எஸ். சுஹீதன் (விளையாட்டுத்துறை பொறுப்பாசிரியர்), எஸ். தசோபன் (அணித் தலைவர்), எஸ்.கே. எழில்வேந்தன் (அதிபர்), எஸ். கௌதமன் (உதவி அணித் தலைவர்), கெ. நிலக்ஷன் (பொறுப்பாசிரியர்), மத்தியவரிசையில் எல். சாரங்கன், ரீ. கௌதமன், ரி. ஹர்ஷன்னா, கே. இயலரசன், எஸ். நிஷான், எஸ். மதுசன், வி. வியாஸ்காந்த், எஸ். துஷாந்தன், எஸ். டிலேசியன், ஆர். ராஜ்க்ளின்டன், ஜே. விதுசன், பின்வரிசையில் ரி. விதுசன், ஏ. ஜெயதர்சன், எஸ். சுஜன், எஸ். நிதர்சன், எம். சன்சயன்.