இலங்கை இருபதுக்கு இருபது குழாத்தில் மீண்டும் லக்மால், ப்ரதீப்!
கொழும்பில் இம் மாதம் நடைபெறவுள்ள சுதந்திரக் கிண்ண மும்முனை சர்வதேச இருபது 20 கிரிக்கெட் தொடருக்கான இலங்கை அணியில் வேகப்பந்துவீச்சாளர்களான சுரங்க லக்மால், நுவன் ப்ரதீப் ஆகிய இருவரும் இணைத்துக்கொள்ளப்பட்டுள்ளனர். ஆனால் விக்கெட் காப்பாளர் நிரோஷன் திக்வெல்ல கவனத்தில் கொள்ளப்படவில்லை.
சுரங்க லக்மால் ஒரு வருடத்துக்குப் பின்னரும் நுவன் ப்ரதீப் இரண்டு மாதங்களுக்குப் பின்னரும் இருபது 20 குழாத்தில் இணைக்கப்பட்டுள்ளனர்.சில காலம் உபாதைக்குள்ளாகியிருந்த அதிரடி வீரர் குசல் ஜனித் பெரேராவும் குழாத்தில் இடம்பிடித்துள்ளார்.
அண்மைக்காலமாக துடுப்பாட்டத்தில் சரிவு கண்டுள்ள திக்வெல்லவுக்குப் பதிலாக தனஞ்செய டி சில்வா குழாத்தில் பெயரிடப்பட்டுள்ளார்.
பங்களாதேஷில் நடைபெற்ற இருபது20 கிரிக்கெட் தொடருக்கான இலங்கை குழாத்தில் இடம்பெற்ற ஜெவ்றி வெண்டர்சே மீண்டும் கவனத்தில் கொள்ளப்படவில்லை.
மூன்று வருடங்களின் பின்னர் தனது மீள்வருகையில் பந்துவீச்சில் பிரகாசித்த சுழல்பந்துவீச்சு சகலதுறை வீரர் ஜீவன் மெண்டிஸுடன் அக்கில தனஞ்சய, அமல அப்போன்சோ ஆகியோர் சுழல்பந்துவீச்சாளர்களாக குழாத்தில் இடம்பெறுகின்றனர்.
வழமையான அணித் தலைவர் ஏஞ்சலோ மெத்யூஸ், அசேல குணரட்ன, ஷெஹான் மதுஷன்க ஆகியோர் உபாதை காரணமாக சேர்த்துக்கொள்ளப்படவில்லை.மெத்யூஸ் விளையாடாததன் காரணமாக இருபது 20 அணித் தலைவர் பதவியும் தினேஷ் சந்திமாலிடம் இப்போதைக்கு ஒப்படைக்கப்பட்டுள்ளது.
சுதந்திரக் கிண்ண மும்முனைத் தொடரின் ஆரம்பப் போட்டியில் இந்தியாவை இலங்கை 6ஆம் திகதி சந்திக்கவுள்ளது.சுதந்திரக் கிண்ண கிரிக்கெட் போட்டிகள் யாவும் கெத்தாராம விளையாட்டரங்கில் நடைபெறும்.
இலங்கை குழாம்
தினேஷ் சந்திமால் (அணித் தலைவர்), உப்புல் தரங்க, தனுஷ்க குணதிலக்க, குசல் மெண்டிஸ், தசுன் ஷானக்க, குசல் ஜனித் பெரேரா, திசர பெரேரா, ஜீவன் மெண்டிஸ், சுரங்க லக்மால், இசுரு உதான, அக்கில தனஞ்சய, அமில அப்போன்சோ, நுவன் ப்ரதீப், துஷ்மன்த சமீர, தனஞ்சய டி சில்வா.
