இராணுவ ஆட்சி, 20 ஆயிரம் புலனாய்வாளர்கள்! - மாவை சேனாதிராஜா வெளியிட்டுள்ள தகவல்.

ஜனாதிபதி கோத்தாபய ராஜபக்சஇராணுவ ஆட்சி ஒன்றை நிறுவினாலும் ஆச்சரியப்படுவதற்கு இல்லை என இலங்கை தமிழரசுக் கட்சியின் தலைவர் மாவை சேனாதிராஜா தெரிவித்துள்ளார். 

இன்று யாழ் ஊடக அமையத்தில் இடம்பெற்ற ஊடக சந்திப்பில் கலந்து கொண்டு கருத்து தெரிவிக்கும் போதே மாவை சேனாதிராஜா இவ்வாறு தெரிவித்துள்ளார்.

கோத்தாபய ராஜபக்சவினுடைய இயல்பு, அவருக்கு இருக்கின்ற இராணுவத்தில் கடமையாற்றிய அனுபவங்கள், இப்போது அவர் ஜனநாயக ரீதியாக ஒரு அரச தலைவராக வந்துள்ளார். மக்களும் ஆதரித்திருக்கின்றார்கள். ஆனால் நாங்கள் அறிந்த வகையில் அவர் வடக்கில் 20 ஆயிரம் உளவாளிகளை நடமாட விட்டிருப்பதாக எங்களுக்கு செய்திகள் கிடைத்திருக்கின்றன.

எதிர்காலத்தில் ஒரு பூரணமான இராணுவ ஆட்சி ஒன்றை அவர் நிறுவினாலும் ஆச்சரியப்படுவதற்கு இல்லை. அப்படித் தான் தற்போதைய நிலைமைகள் இருக்கின்றன.

இந்த நிலைமையில் இன்றைக்கு ஜனநாயக சக்திகள் எதிர் அணியிலே ஐக்கிய தேசியக் கட்சியும் பலவீனப்பட்டு பிளவுபட்டு நிற்கின்ற ஒரு நிலைமை இருக்கின்றது.

அதை விட முஸ்லிங்கள் தரப்பில், மலையக தரப்பில் கூட எல்லோரும் பலமாக அல்லது ஒன்றாக இருக்கின்றார்கள் என்ற நிலைமை இன்னும் ஏற்படவில்லை.

அதை விட முக்கியமாக வடக்கு கிழக்கு பிரதேசங்களிலே தமிழ்த் தேசியக் கூட்டமைப்பு ஒட்டுமொத்தமாக ஒரு பலமான நிலையை, பிரதிநிதித்துவத்தை நிரூபிக்க வேண்டிய ஜனநாயக சக்தியாக பலமடைய வேண்டிய நிலமை ஏற்பட வேண்டும்.

ஆனால் இதுவரையில் கிழக்கிலிருந்து வடக்கு வரைக்கும் பல மாவட்டங்களுக்கு நான் பயணம் செய்திருக்கின்றேன். பல நிகழ்வுகளில் கலந்து கொண்டிருக்கின்றேன். மக்கள் பெரும்பாலும், சில இடங்களில் அண்மைக்கால நிகழ்வுகள் தொடர்பாக சில சங்கடங்கள் இருந்தாலும் அவர்கள் மிக உறுதியாக இருக்கின்றார்கள். தமிழ்த் தேசியக் கூட்டமைப்பை பெரு வெற்றிபெற வைப்பதே இப்போது தேவை என நினைக்கின்றார்கள் என மவை சேனாதிராஜா தெரிவித்துள்ளார்.