ஜகார்த்தாவில் இலங்கையர் மூவருக்கு முதலிடங்கள்
இந்தோனேஷியாவின் ஜகார்த்தாவில் நடைபெற்றுவரும் ஆசிய விளையாட்டு விழாவை நோக்கிய பயணத்திற்கான பரீட்சார்த்த மெய்வல்லுநர் போட்டிகளில் இலங்கை வீர, வீராங்கனைகள் சிறந்த பெறுபேறுகளைப் பெற்றுள்ளனர்.
ஆண்களுக்கான 100 மீற்றர் ஓட்டப் போட்டியை 10.30 செக்கன்களில் நிறைவு செய்த வினோஜ் சுரஞ்சய டி சில்வா வெற்றிபெற்று தங்கப் பதக்கத்தை சுவீகரித்தார். இவர் தகுதிகாண் சுற்றில் 10.28 செக்கன்கள் என்ற நேரப் பெறுதியைப் பதிவு செய்திருந்தார்.
100 மீற்றர் ஓட்டப் போட்டியில் இந்தோனேஷியாவின் முஹம்மத் ஸோஹ்ரி இரண்டாம் இடத்தையும் இந்தியாவின் தாசன் வடிவேலு மூன்றாம் இடத்தையும் பெற்றனர்.ஆண்களுக்கான 400 மீற்றர் ஓட்டப் போட்டியை 46.83 செக்கன்களில் ஓடி முடித்த தாருஷ தனஞ்சய முதலாம் இடத்தைப் பெற்றார். இப் போட்டியில் மற்றொரு இலங்கையரான டிலிப் ருவன் மூன்றாம் இடத்தைப் (47.67 செக்.) பெற்றார். இந்தியாவின் ஜித்து பேபி (46.88 செக்.) இரண்டாம் இடத்தைப் பெற்றார்.
பெண்களுக்கான ஈட்டி எறிதலில் 55.13 மீற்றர் தூரத்தைப் பதிவுசெய்த டில்ஹானி லேக்கம்கே தங்கப் பதக்கத்தை வென்றார்.பெண்களுக்கான முப்பாய்ச்சலில் வெற்றிபெறக்கூடியவர் என பெரிதும் எதிர்பார்க்கப்பட்ட விதூஷா லக் ஷானி 13.28 மீற்றர் தூரம் பாய்ந்து வெள்ளிப் பதக்கத்தையே வென்றெடுத்தார். ஹஷினி பாலசூரியவுக்கு வெண்கலப் பதக்கம் (12.98 மீற்றர்) கிடைத்தது.
ஆண்களுக்கான 5,000 மீற்றர் ஓட்டப் போட்டியில் ஆர்.எம்.எஸ். புஷ்பகுமாரவுக்கு மூன்றாம் இடம் (14 நி. 34.86 செக்) கிடைத்தது.
ஆண்களுக்கான ஈட்டி எறிதலில் சம்பத் ரணசிங்க (75.39 மீற்றர்) இரண்டாம் இடத்தையும் பெண்களுக்கான 400 மீற்றர் ஓட்டப் போட்டியில் உபமாலிக்கா ரத்னகுமாரி (54.89 செக்.) மூன்றாம் இடத்தையும் பெற்றனர்.
