கட்டுநாயக்க வந்த தென்னாபிரிக்க ஜனாதிபதியுடன் ரணில் சந்திப்பு!

தென்னாபிரிக்க ஜனாதிபதி சிறில் ரமபோஷா, இன்று காலை, இலங்கைக்கு குறுகிய நேரப் பயணம் ஒன்றை மேற்கொண்டிருந்தார். ஜி20 மாநாட்டில் பங்கேற்பதற்காக, ஜப்பான் நோக்கி பயணித்த அவர், இன்று காலை கட்டுநாயக்க விமான நிலையத்தை வந்தடைந்தார்.

தென்னாபிரிக்க விமான சேவைக்குச் சொந்தமான விசேட விமானமொன்றில், காலை 10.20 மணியளவில், கட்டுநாயக்க விமான நிலையத்தை வந்தடைந்தார். அவருடன், 20 பேர் அடங்கிய குழுவினரும் வருகைதந்திருந்தனர். தென்னாபிரிக்க ஜனாதிபதி உள்ளிட்ட குழுவினரை, பிரதமர் ரணில் விக்கிரமசிங்க, அமைச்சர் அர்ஜூன ரணதுங்க உள்ளிட்ட குழுவினர் வரவேற்றனர்.

இதனையடுத்து, பிரதமர் ரணில் விக்கிரமசிங்கவுக்கும், தென்னாபிரிக்க ஜனாதிபதிக்கும் இடையில், கட்டுநாயக்க விமான நிலையத்தில் குறுகிய கலந்துரையாடல் ஒன்றும் இடம்பெற்றுள்ளது. இதனையடுத்து, விமானத்துக்கு தேவையான எரி​பொருளை பெற்றுகொண்டு, பி.ப.12 மணியளவில், தென்னாபிரிக்க ஜனாதிபதி உள்ளிட்ட குழுவினர், ஜப்பான் நோக்கி பயணித்தனர்.