இந்தியாவில் உச்சம் தொடும் கொரோனா!! -24 மணி நேரத்தில் 10 ஆயிரத்தை நெருங்கியது-

இந்தியாவில் கொரோனாவின் தாண்டவம் உச்சத்தை தொட்டுள்ள நிலையில் கடந்த 24 மணி நேரத்தில் இதுவரை இல்லாத அளவுக்கு 9,851 பேருக்கு கொரோனா கண்டறியப்பட்டுள்ளது.

மத்திய சுகாதாரத்துறை வெளியிட்டு உள்ள தகவலில் கூறி இருப்பதாவது:-

இந்தியாவில் 24 மணி நேரத்தில் இதுவரை இல்லாத அளவுக்கு 9,851 பேருக்கு கொரோனா கண்டறியப்பட்டுள்ளது. 24 மணி நேரத்தில் கொரோனா பாதிப்பால் 273 பேர் உயிரிழந்துள்ளனர். நாட்டில் மொத்த கொரோனா பாதிப்பு 2,26,770 ஆக உயர்ந்துள்ளன. 

மொத்த இறப்பு எண்ணிக்கை 6348 ஆக உயர்ந்து உள்ளது. மீட்பு வீதம் அல்லது மக்கள் குணமடைவதற்கான வாய்ப்புகள் 48.27 சதவீதம் ஆகும் என கூறி உள்ளது.

நாட்டில் கொரோனா பாதிப்பு வேகமாக பரவி வருகிறது. ஊர்டங்கில்  தளர்வு அறிவிக்கப்பட்டதால், கொரோனா வைரஸ் வேகமாக பரவி வருவதாக சொல்லப்படுகிறது. இந்தியாவில் ஜனவரி 30 ஆம் திகதி கேரளாவில் ஒருவருக்கு கொரோனா வைரஸ் பாதிப்பு இருப்பது கண்டுபிடிக்கப்பட்டது. படிப்படியாக உயர்ந்து தற்போது இந்தியாவில்  226770 பேரை கொரோனா தாக்கியுள்ளது.

கடைசி 15 நாள்களில் மட்டும் இந்தியாவில் ஒரு இலட்சம் பேருக்கு புதியதாக கொரோனா தொற்று ஏற்பட்டுள்ளது. நேற்று ஒரே நாளில் இந்தியாவில் 9,304 பேர் புதியதாக கொரோனா தொற்றுக்குள்ளாகியுள்ளனர். 

இன்று இது மேலும் அதிகரித்து 9851 புதிய பாதிப்பு ஏற்பட்டு உள்ளது. இதே வேகத்தில் கொரோனா பரவி வந்தால், இன்னும் இரு நாள்களில் இத்தாலியை நாம் முந்தி விடுவோம் என்றுள்ளது.