வவுனியா தனிமைப்படுத்தல் முகாம்களில் இருந்து 310 பேர் விடுவிப்பு!

வவுனியா இராணுவ முகாம்களில் தனிமைப்படுத்தப்பட்டிருந்த மற்றொரு தொகுதி விமான பயணிகள் இன்று விடுவிக்கப்பட்டனர்.

கொரோனோ வைரஸ் தாக்கத்தையடுத்து, வவுனியா மாவட்டத்தில், பம்பைமடு இராணுவ முகாம், வேலங்குளம் விமானபடைத் தளம், பெரியகட்டு இராணுவ முகாம் ஆகிய பகுதிகளில் அமைக்கப்பட்டிருந்த தனிமைப்படுத்தல் நிலையங்களில், கனடா, இலண்டன் இத்தாலி, தென்கொரியா, ஈரான் ஆகிய நாடுகளில் இருந்து திரும்பியவர்கள் 14 நாள்கள் தனிமைப்படுத்தி வைக்கப்பட்டிருந்தனர்.

குறித்த முகாமில் தங்கவைக்கப்பட்டிருந்த 167 பேர் 28ஆம் திகதி விடுவிக்கப்பட்ட நிலையில், இன்று மேலும் 310 பயணிகள் விடுவிக்கப்பட்டனர்.

வேலங்குளம் விமானப்படை தளத்தில் இருந்த 206 பேரும் பெரியகட்டு முகாமில் இருந்த 104 பேருமே இதன்போது விடுவிக்கப்பட்டனர்.

அவர்களுக்கு நோய்தொற்று இல்லை என்று உறுதிப்படுத்தப்பட்ட பின்னரே, அவர்கள் தமது வதிவிடங்களுக்குச் செல்ல அனுமதிக்கப்பட்டிருந்தனர்.

இதேவேளை, 14 நாள்கள் தனிமைப்படுத்தப்பட்டு நோய்தொற்று இல்லை என்று உறுதிப்படுத்தப்பட்டமைக்கான சான்றிதழ்களும் அவர்களுக்கு வழங்கி வைக்கப்பட்டன.

காலி,மாத்தறை ,கொழும்பு, கண்டி, அளுத்கம ஆகிய பகுதிகளை சேர்ந்த சிங்கள மக்களும் வடக்கின் முல்லைத்தீவு, மன்னார், யாழ்ப்பாணம், வவுனியா, கிளிநொச்சி பகுதிகளைச் சேர்ந்த 28 தமிழ் மக்களும் இதன்போது விடுவிக்கப்பட்டனர்.