சாலையில் நடந்து சென்ற போது மின்கம்பத்தை பிடித்ததால் மின்சாரம் தாக்கி இளம்பெண் உயிரிழப்பு!

குஜராத்தில் மழையில் நனைந்திருந்த மின்கம்பத்தை பிடித்த இளம்பெண், மின்சாரம் தாக்கி பலியான சிசிடிவிக் காட்சிகள் வெளியாகி அதிர்ச்சியை ஏற்படுத்தியுள்ளன. 

குஜராத் மாநிலம் சூரத் நகரில், காஜல் என்ற 20 வயது இளம்பெண், சாலையில் நடந்து சென்றுள்ளார். அப்போது மழை பெய்து ஓய்ந்திருந்த நிலையில், நடந்து சென்று கொண்டிருந்த காஜல், தற்செயலாக அங்கிருந்த மின்கம்பத்தை பிடித்து கடக்க முயன்றார்.

மழையில் முழுவதும் நனைந்திருந்த மின்கம்பத்திலிருந்து அவர் மீது மின்சாரம் பாய்ந்ததில், அப்படியே கம்பத்திலேயே சாய்ந்தார். தங்கள் மீதும் மின்சாரம் பாயும் என்ற அச்சத்தில் யாரும் உதவிக்கு வராத நிலையில், தகவலறிந்து வந்த பெண்ணின் பெற்றோர் அவரை மீட்டு மருத்துவமனைக்கு கொண்டு சென்றனர்.

ஆனால் அவர் மின்சாரம் பாய்ந்த உடனேயே உயிரிழந்து விட்டதாக மருத்துவர்கள் தெரிவித்துள்ளனர். இளம்பெண் கம்பத்தை பிடித்து பலியாகும் சிசிடிவிக் காட்சிகள் தற்போது வெளியாகி அதிர்ச்சியை ஏற்படுத்தியுள்ளன.