தாண்டவன்வெளியில் வீடு முற்றுகை - யுவதியுடன் 7 மாணவர்கள் கைது!
மட்டக்களப்பு- தாண்டவன்வெளி பகுதியிலுள்ள வீடொன்றை முற்றுகையிட்ட பொலிசார், 27 வயது யுவதியொருவரையும், க.பொ.த உயர்தரத்தில் கல்வி பயிலும் மாணவர்கள் 7 பேரையும் இன்று பிற்பகல் கைது செய்துள்ளனர்.
தாண்டவெளி, பாரதி வீதி, இரண்டாம் குறுக்கு தெருவிலுள்ள குறித்த வீட்டில், மாணவர் குழுக்களின் அட்டகாசம் தொடர்ச்சியாக இடம்பெற்று வருவதாக, பொலிஸாருக்குக் கிடைத்த தகவலின் அடிப்படையில், அவ்வீட்டைத் திடீரென முற்றுகையிட்டபோதே, இவர்கள் கைது செய்யப்பட்டுள்ளனர்.
இந்தச் சுற்றிவளைப்பின் போது, அவ்வீட்டிலிருந்து கஞ்சா, சிகரெட்டுகள் உள்ளிட்ட போதைப்பொருட்களும் ஆண் உறைகளும் மீட்கப்பட்டதாக, பொலிஸார் தெரிவித்தனர். மகன், மட்டக்களப்பில் கல்வி கற்பதற்காக அந்த வீட்டை பெற்றோர் வாடகைக்குப் பெற்றுக் கொடுத்திருந்தனர்.
மகன், தனது நண்பர்களை இணைத்துக்கொண்டு, இவ்வாறான செயற்பாடுகளை மேற்கொண்டு வந்துள்ளதாகவும் மட்டக்களப்பு பொலிஸார் தெரிவித்தனர். கைது செய்யப்பட்டுள்ள யுவதி, தனது காதலனைச் சந்திப்பதற்காக அங்கு வருகை தந்ததாக ஆரம்பக்கட்ட விசாரணைகளில் இருந்து தெரிய வந்துள்ளது.
யுவதியை விசாரணை செய்த மட்டக்களப்பு பொலிஸார், மட்டக்களப்பு போதனா வைத்தியசாலையில் யுவதியை அனுமதித்து, மருத்துவ பரிசோதனை செய்ய நடவடிக்கை எடுக்கப்பட்டுள்ளதாகத் தெரிவித்தனர். கைது செய்யப்பட்டவர்கள் தொடர்பான விசாரணைகள் தொடர்ந்து மேற்கொள்ளப்பட்டுவருவதாகவும் மட்டக்களப்பு பொலிஸார் தெரிவித்தனர்.