வவுனியா, நெளுக்குளம் பகுதியில் வாள்வெட்டு - இளைஞன் படுகாயம்!

வவுனியா, நெளுக்குளம் பகுதியில் இன்று இடம்பெற்ற வாள்வெட்டு சம்பவத்தில் ஒருவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார். 

செட்டிக்குளம், தட்டாங்குளம் பகுதியை சேர்ந்த 27வயதுடைய நவசுதர்சன் என்பவரே படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார்.அவரின் இரு கால்கள் மற்றும் வலது கையில் பாரிய வெட்டுக்காயங்கள் காணப்படுவதாக வைத்தியாலை வட்டாரங்கள் தெரிவிக்கின்றன.     

வியாபார நடவடிக்கைகளுக்காக தட்டாங்குளம் பகுதியிலிருந்து வவுனியா நகரை நோக்கி பயணித்துக் கொண்டிருந்த அவரை, நெளுக்குளம் சந்திக்கு அருகில், முகத்தினை மறைத்துக் கொண்டு பற்றைக்குள் பதுங்கி நின்ற இருவர், சரமாரியாக வாள்வெட்டு தாக்குதல் மேற்கொண்டு விட்டுத் தப்பிச் சென்றுள்ளனர்.

குறித்த சம்பவம் தொடர்பான மேலதிக விசாரணைகளை நெளுக்குளம் பொலிஸாருடன் இணைந்து வவுனியா பொலிஸாரும் மேற்கொண்டு வருகின்றனர்.