செவ்வந்திக்கு பிறந்தநாள் கொண்டாடிய பொலிஸ் அதிகாரிக்கு ஒழுக்காற்று நடவடிக்கை

கனேமுல்ல சஞ்சீவ' படுகொலை செய்யப்பட்ட வழக்கில் முதன்மைச் சந்தேக நபராகக் கருதப்படும் இஷாரா செவ்வந்திக்கு, அவர் சிறையில் இருக்கும்போது பிறந்தநாள் விழா கொண்டாடியதாக எழுந்த குற்றச்சாட்டை  தொடர்ந்து, கொழும்பு குற்றத்தடுப்புப் பிரிவின் (CCD) பொறுப்பதிகாரிக்கு எதிராகக் கடும் ஒழுங்காற்று நடவடிக்கை எடுக்கப்பட்டுள்ளது.

2025-ம் ஆண்டு பெப்ரவரி மாதம் அளுத்கடை நீதிமன்ற வளாகத்தில் வைத்து கனேமுல்ல சஞ்சீவ சுட்டுக் கொல்லப்பட்ட சம்பவத்தில், கொலையாளிக்குத் துப்பாக்கியை வழங்கியவர் மற்றும் இந்தச் சதித்திட்டத்தின் பின்னணியில் இருந்தவர் என இஷாரா மீது குற்றம் சுமத்தப்பட்டுள்ளது.

சம்பவத்திற்குப் பிறகு நேபாளத்திற்குத் தப்பிச் சென்ற அவர், கடந்த ஆண்டு அக்டோபர் மாதம் சர்வதேசப் புலனாய்வு அமைப்புகளின் உதவியுடன் கைது செய்யப்பட்டு இலங்கைக்கு அழைத்து வரப்பட்டார்.

தற்போது தடுப்புக்காவலில் வைக்கப்பட்டு விசாரிக்கப்பட்டு வரும் ஒரு பாரிய குற்றச் செயலுடன் தொடர்புடைய கைதிக்கு, ஒரு பொறுப்பு வாய்ந்த காவல்துறை அதிகாரி பிறந்தநாள் கொண்டாட்டத்தை ஏற்பாடு செய்தது துறைசார்ந்த ஒழுக்க விதிகளுக்கு எதிரானது எனச் சுட்டிக்காட்டப்பட்டுள்ளது.

இது குறித்து உயர்மட்டக் காவல்துறை அதிகாரிகள் தீவிர விசாரணைகளைத் தொடங்கியுள்ளதோடு, அந்தப் பொறுப்பதிகாரிக்கு எதிராகத் துறை ரீதியான நடவடிக்கைகள் முன்னெடுக்கப்பட்டுள்ளது. 

இந்தக் கொண்டாட்டத்தில் வேறு யாரெல்லாம் கலந்துகொண்டார்கள் மற்றும் இதற்கான பின்னணி என்ன என்பது குறித்தும் மேலதிக விசாரணைகள் நடைபெற்று வருகின்றன.